400.000 barn truga av sveltedød i Kongo
Over 400.000 barn under fem år i Kongo er no så underernærte at dei står i fare for å døy av svolt innan få månader, åtvarar FNs barnefond UNICEF.
Situasjonen er verst i Kasai-regionen, der ein blodig konflikt har drive 1,4 millionar menneske på flukt det siste halvtanna året.
Konflikten har også ramma jordbruket i regionen, der innbyggjarane no er avhengige av snarleg matvarehjelp utanfrå.
Ifølgje Tajudeen Oyewale, som leier UNICEFs hjelpearbeid i Kongo, er 220 helsesenter og klinikkar heilt eller delvis øydelagde som følgjer av konflikten.
Den katolske kyrkja i Kongo anslo for nokre månader sidan at minst 3.300 menneske til då var drepne i kamphandlingar i Kasai-regionen.
Human Rights Watch skuldar kongolesiske regjeringsstyrkar for å ha stått bak dei fleste drapa og reknar med at rundt 5.000 menneske er drepne i regionen sidan sommaren 2016.
UNICEF har tidlegare slått fast at over 850.000 barn i Kasai-regionen verken har tilgang til utdanning eller helsetenester, og at mange av dei blir rekrutterte til barnesoldatar i ulike militsgrupper.
Konflikten i Kasai-regionen byrja då regjeringa nekta å anerkjenne statusen til ein lokal tradisjonell leiar. Han mobiliserte sin eigen milits, og då han blei drepen i august 2016, blussa konflikten kraftig opp.
(©NPK)