Antirasistisk Senter vil fjerne Alliansen frå Arendalsveka
Antirasistisk Senter krev at arrangøren av Arendalsveka revurderer om partiet Alliansen skal få delta, etter Twitter-meldingar av partileiaren.
«It is treason and the treasonous shall hang» og «Svikere, landssvikerne, forræderne mot det norske folk skal stilles for retten og dømmes. Lov og dom. Alliansen er det eneste partiet med kandidater som fremmer at det må til et nytt landssvikar-oppgjør (...)» er meldingane frå Alliansen-partileiar Hans Jørgen Lysglimt Johansen.
Dei fekk Antirasistisk Senter og Norsk tjenestemannslags ungdomsorganisasjon (NTL Ung) til å be arrangørane revurdere deltakinga til det partiet under den politiske festivalen.
- Det fekk oss til å tippe heilt over då han på Twitter tok til orde for å avrette meiningsmotstandarar. Då er vi over i Breivik-territorium kva gjeld ideologi, seier Rune Berglund Steen, leiar for senteret til Vårt Land.
Alliansenleiar Lysglimt Johansen meiner motstandarane prøver å stanse ytringsfridomen og seier meldingane ikkje skal tolkast bokstaveleg.
- Det er skrivne i eit poetisk språk. Det er også skrivne på engelsk, og det er eigentleg eit sitat frå den engelske «Treason Act», seier han til avisa.
Leiaren for hovudprogramkomiteen i Arendalsveka, Øystein Djupedal, fortel at dei vurderer kva organisasjonar som får delta og seier at Alliansen blir sett på som innanfor oppdraget til festivalen.
- Vi skal vere ein festival for heile demokratiet, seier han.
(©NPK)
Rune Berglund Steen reagerer sterkt på Twitter-meldingar frå Alliansen-leiaren. Foto: Vidar Ruud / NTB scanpix