Avis: Trump vurderer 25 prosent toll på bilimport

Avisa melde at Det kvite hus vurderer å sette i verk ein såkalla Section 232-etterforsking av bilhandelen. Handelsminister Wilbur Ross bekreftar i ei fråsegn natt til torsdag at han vil, på oppfordring av Trump, undersøkje dette.

Om handelsdepartementet finn at importen truar nasjonal sikkerheit, vil det la seg gjere å innføre ei slik avgift.

- Store nyheiter

Trump ser ut til å ha hinta til denne planen allereie tysdag:

- Snart kjem det store nyheiter for våre flotte amerikanske bilforhandlarar. Etter å ha tapt arbeidsplassar til andre land i fleire tiår, har dei venta lenge nok!, skreiv han på Twitter.

I ei anna melding, der han refererer til handelsdiskusjonen med Kina, skreiv han at mens samtalane bevegde seg i rett retning «vil vi til slutt truleg måtte ta i bruk ein annan struktur». Trump har fleire gonger rast mot Kinas høge importavgift på bilar.

Handelsunderskot

Tysdag vart det kjent at Kina har tilbode seg å senke avgifta frå 25 til 15 prosent. Trump har likevel kravd at landet senkar importavgifta på personbilar til 2,5 prosent, det same som USA har. Han har også kravd at landet kuttar alle andre tollsatsar og avgifter til same nivå som USA.

USA slit med eit gigantisk handelsunderskot med Kina, i fjor på over 3.000 milliardar kroner.

Kjelder som avisa siterer, seier Trumps planar om ei importavgift er venta å møte stor motstand hos handelspartnarar og bilforhandlarar som sel importerte bilar.

(©NPK)

USAs president Donald Trump vurderer å innføre ei importavgift på 25 prosent på bilar, ifølgje The Wall Street Journal. Foto: Evan Vucci / AP / NTB scanpix