Bronseguten klar for lagsprint
Bronsemedaljen på VM-sprinten sende Johannes Høsflot Klæbo rett inn på det norske laget til lagsprinten i meisterskapen.
Det stadfesta sprinttrenar Arild Monsen få minutt etter at sprintmedaljane var fordelt i VM-byen Lahti torsdag.
-Kven den andre løparen blir, blir klart fredag, opplyste Monsen vidare.
Finn Hågen Krogh var nest beste norske løpar på sprinten torsdag. Han er likevel neppe aktuell for lagsprinten søndag. Krogh er teken ut på laget til skiathlon laurdag, og den oppgåva lèt seg ikkje kombinera med lagsprint dagen etterpå.
Emil Iversen kan vera éin aktuell kandidat til den andre plassen på lagsprinten, Sindre Bjørnstad Skar ein annan.
(©NPK)