Calais-leiren blir stengd måndag
(NPK-NTB-AFP): «Jungelen» i Calais skal måndag tømmast for flyktningar og migrantar, opplyser franske styresmakter. Leiren som husar over 6.000 menneske, skal deretter øydeleggjast.
Det har lenge vore varsla at den provisoriske flyktningleiren i den nordfranske hamnebyen skal stengjast. Tidlegare denne veka avviste ein domstol eit siste forsøk frå hjelpeorganisasjonar på å redda leiren.
Fredag stadfestar styresmaktene at det omfattande arbeidet med å stengja leiren for godt, startar førstkommande måndag. Migrantane er nøydde til å forlata området innan klokka 8 måndag morgon, heiter det.
Innanriksdepartement forsikrar at alle dei 6.486 migrantane som styresmaktene har telt i «Jungelen», skal få tilbod om plass på mottakssenter – anten i Frankrike eller i utlandet. Allereie måndag er det meininga at heile 3.000 menneske – fordelt på 60 bussar – skal køyrast ut av Calais, ifølgje lokale styresmakter. 1.250 politifolk skal vera med i aksjonen.
Denne veka har titals einslege mindreårige reist frå Calais til Storbritannia etter at britane gjekk med på å vurdera sakene til fleire hundre barn som har familiemedlemmer på den andre sida av kanalen.
Heile 1.291 tenåringar seier dei har familie eller slektningar i Storbritannia. Dei fleste av dei må bli i Frankrike til britiske styresmakter har behandla søknadene deira om familiegjenforeining. (©NPK)