Deila tek over for Rekdal i Vålerenga

Det betyr at trenarskiftet i klubben skjer vel to månader tidlegare enn planlagt. Det har lenge vore klart at Deila skulle bli trenar for klubben frå årsskiftet, og at Rekdal går over i rolla som sportsleg leiar.

Både Rekdal og Deila stadfestar overfor VG at dei har bestemt seg for å gå inn i dei nye rollene sine allereie no.

– Ronny har leidd alle treningane denne veka, og det er naturleg at den stemma også blir den som leier spelarmøte og kampleiing. Det er ikkje noko dramatikk i dette, men vi har diskutert oss fram til at dette er den beste løysinga, seier Rekdal til avisa.

– Vi gjer dette fordi vi trur det er best for laget. Når du har hatt treningane dei to siste vekene er det naturleg å følgja opp med også å ha kampleiinga. Vi trur det er ei god løysing, og eg gler meg veldig til å vera med for fullt, seier Deila.

Vålerenga såg ut til å sikra eliteserieplassen med ein sterk periode i sommar og tidleg i haust, då laget tok 17 poeng på sju strake kampar utan tap. No har laget spelt fem seriekampar på rad utan siger og er i nedrykksstriden med begge beina.

I dei tre siste serierundane ventar Tromsø (borte), Lillestrøm (heime) og Viking (borte). Allereie etter kampen i Tromsø søndag kan laget vera på nedrykksplass, om rivalane i botnstriden vinn.

Deila sat på benken allereie i 1-1-kampen mot Stabæk sist helg, då i ei slags observatørrolle. (©NPK)