Det blir kamp om studentbustadene i år også
(NPK-NTB): Det er berre 0,07 prosent fleire studentar som vil kunna bu i studentbustad i år enn i fjor. Norsk studentorganisasjon fryktar endå meir pressa privat leigemarknad.
Dei siste fem åra har det blitt 45.000 fleire studentar, medan det berre har blitt bygd 7.743 nye studentbustader, viser studentbustadundersøkinga til Norsk studentorganisasjon (NSO).
– Studentbustadbygginga klarar ikkje å halda tritt med auken i studentmassen. Trass den store satsinga til regjeringa på studentbustader, ser vi berre ein marginal auke i delen studentar som får tilgang til studentbustad, seier leiar Marianne Andenæs i Norsk studentorganisasjon.
På landsbasis kan 15 prosent av studentane bu i studentbustad. Men det er store variasjonar mellom studiestadane, frå nesten 40 prosent dekning i Indre Finnmark, til knappe 8 prosent i Hedmark.
– Dess færre som har tilgang på studentbustad, dess større blir presset på den private leigemarknaden. Vi er redd endå fleire studentar må velja deltidsjobbing på kostnad av studietid for å få endane til å møtest, seier Andenæs. (©NPK)