Eitt poeng for Riise
(NPK-NTB): John Arne Riise og lagkameratane i indiske Chennaiyin måtte nøye seg med eitt poeng i kampen mot Pune City søndag.
Etter å ha vore plassert på benken i møtet med ligaleiar Northeast sist veke, var Riise tilbake i midtforsvaret til Chennaiyin til bortekampen søndag.
Jeje Lalpekhlua sende gjestene i leiinga før pause, og lenge såg det ut til å bli den einaste scoringa i kampen. Åtte minutt før slutt kom likevel utlikninga signert Anibal Rodriguez.
Etter kampen var Chennaiyin-trenar Marco Materazzi oppgitt.
– Eg hadde vore fornøgd med 1-0, men ikkje med 1– 1. Eg er oppgitt fordi vi kasta vekk to poeng, men alt i alt gjorde vi ein god kamp, sa italienaren til nettsidene til den indiske ligaen.
Der får dessutan John Arne Riise best karakter av alle spelarane for prestasjonane sine i kampen.
Med det eine poenget søndag har Chennaiyin to lag framom seg på tabellen. Opp til ligaleiar Northeast skil det to poeng. (©NPK)