Emirata hevdar at flyplassen i Hodeida er erobra

- Med deltaking og støtte frå styrkane frå Emirata, har den felles jemenittiske motstandshæren tatt flyplassen i Hodeida, melder det statlege nyheitsbyrået WAM i Dei sameinte arabiske emirata.

Overfor AFP bekreftar ei jemenittisk regjeringskjelde at flyplassen sør for Hodeida no er kontrollert av styrkar frå Emirata og regjeringsvennleg milits, etter fleire dagar med harde kampar.

Ei jemenittisk militærkjelde AP har snakka med, avviser dette og seier at skarpskyttarane og minene til Houthi-opprørarane hittil har gjort det umogleg å ta kontroll over flyplassen.

Massive flyangrep

Området rundt flyplassen har vore utsett for massive flyangrep frå den saudileidde koalisjonen dei siste dagane, og det blir meldt om mange drepne.

Houthi-opprørarane har avvist krav om tilbaketrekking frå Hodeida og har dei siste dagane svart på angrepa ved å angripe andre regjeringskontrollerte område.

FN og hjelpeorganisasjonar har forlate byen og fryktar at militæroffensiven vil få katastrofale følgjer.

Livsviktig hamn

Jemen står på randa av ei svoltkatastrofe, og over 22 millionar menneske er heilt avhengig av matvarehjelp utanfrå.

Rundt 80 prosent av forsyningane kjem sjøvegen til Hodeida, og frykta er at krigshandlingane vil føre til at hamna blir stengt.

Masseflukt

FN åtvarar også mot masseflukt av sivile frå byen, der det bur rundt 600.000 menneske, og opplyste måndag at 26.000 menneske alt har forlate heimane sine.

Tryggingsrådet kravde i ei fråsegn i førre veke at hamna i Hodeida blir halden open, og gav uttrykk for djup bekymring rundt risikoen som følgje av den humanitære situasjonen s på grunn av den saudileidde offensiven mot byen.

(©NPK)

Saudileidde militssoldatar fortset stormløpet mot hamnebyen Hodeida i Jemen som har vore kontrollert av Houthi-opprørarane sidan 2014. Foto: Arab 24 / AP / NTB scanpix