ESA: Schiaparelli krasjlanda på Mars
(NPK-NTB-AP): Landingssonden Schiaparelli krasjlanda på Mars og kan ha eksplodert i samanstøyten med den raude planeten, opplyser Den europeiske romfartsorganisasjonen ESA.
Rett før Schiaparelli skulle landa tidlegare denne veka, stoppa signala, og sidan har det vore stille frå sonden. NASA-sonden Mars Reconnaissance Orbiter har no teke bilete som viser ein svart flekk i området der sonden til ESA skulle landa.
Landingssonden er eit prøveprosjekt for å førebu ein ekspedisjon i 2020, der det skal sendast ein rullande robot til den raude planeten.
Schiaparelli blei skilt ut frå moderfartøyet Trace Gas Orbiter (TGO), som har lagt seg inn i bane rundt Mars. Denne viktigaste og største delen av prosjektet gjekk som det skulle.
Fredag opplyser ESA at problema til Schiaparelli truleg oppstod i dei siste 50 sekunda av nedstiginga gjennom den barske atmosfæren til planeten. Bileta frå NASA-sonden kan tyda på at drivstoffet til sonden eksploderte i samanstøyten. (©NPK)