Fann kulturminne med metalldetektor – dømt til fengsel
(NPK-NTB): Gjennom fleire år med metalldetektorsøk fann ein mann frå Larvik fleire kulturminne. No må han sone 21 dagar i fengsel fordi han beheldt alle gjenstandane sjølv utan å rapportere dei.
På seks år fann mannen minst 22 gjenstandar som vert rekna som kulturminne. Det dreier seg mellom anna om vektlodd av bly, som arkeologar har slått fast at stammar frå jernalderen eller mellomalderen.
Mannen byrja med sin nye hobby i 2009. Først eitt år seinare blei han klar over regelverket for funn og innmelding av kulturminne, men han heldt likevel fram å ta vare på alt han fann sjølv, ifølgje dommen som fall i Larvik tingrett tysdag.
– Tiltalte forklarte til politiet at han syntest det var betre at han beheldt gjenstandane sjølv og viste dei fram til venner og kjenningar, enn at dei støva ned i ei skuff i Oslo, står det i dommen.
Aktor meinte mannen burde dømmast til 27 dagars fengsel. Retten har ikkje funne rettspraksis i tilsvarande saker tidlegare, men landa på at 21 dagars fengsel utan vilkår var passande straff.
Larvik tingrett viser særleg til forklaringa til fylkesarkeolog Ragnar Orten Lie, som seier at sjølv om gjenstandane i seg sjølve er av kulturhistorisk interesse, er det funnstaden eller konteksten som er av størst kulturhistorisk betydning.
– Sjølv om offentlege styresmakter tek over gjenstandane vert denne kunnskapen sett som tapt, og mannen har etter det retten meiner gjort irreversibel skade i si jakt etter nye kulturminne til samlinga, heiter det i dommen. (©NPK)