Finnmark nektar å møta Mæland om tvangssamanslåing

Kommunalminister Monica Mæland (H) har kalla inn Troms og Finnmark på teppet for å få fortgang i tvangssamanslåinga av fylka, men Finnmark vil ikkje møta.

Kommunalminister Monica Mæland (H) har kalla inn Troms og Finnmark på teppet for å få fortgang i tvangssamanslåinga av fylka, men Finnmark vil ikkje møta.

- Det er heilt uaktuelt å møta kommunalministeren med den agendaen ho har på dette møtet, seier fylkesordførar Ragnhild Vassvik (Ap) til Aftenposten.

- Det einaste møtet vi vil stilla på, er eit møte der vi kan diskutera korleis Finnmark kan halda fram som eige fylke, seier ho vidare.

Mæland avviste før helga å ta over og fullføra prosessen med samanslåinga av Troms og Finnmark, slik fylkestinget i Troms bad om.

I staden inviterte Mæland fylkestoppane i Troms og Finnmark til ein alvorsprat på kontoret hennar i Oslo 20. august.

- Troms og Finnmark sluttar å eksistera 1. januar 2020. Det må leiarane i dei to fylka no innretta seg på og ta ansvaret for, strekar Mæland under.

Fylkesordførar Ragnhild Vassvik seier at ho ikkje vil møta så lenge agendaen til Mæland for møtet er å få dei to fylka til å sluttføra samanslåingsprosessen.

- Vi vil be Mæland om ta saka til Stortinget. Det er der ho høyrer heime, seier fylkesordførar Vassvik og utdjupar.

- Eg ønskjer svært gjerne eit møte med statsråden, men då må agendaen vera ein annan og meir konstruktiv. Eg vil drøfta korleis Finnmark kan halda fram som eige fylke. Finnmark ønskjer å diskutera ein plan for korleis vedtaket om tvangssamanslåing av eit fylke der 87 prosent har sagt nei ei folkeavstemming, kan takast tilbake til Stortinget og opphevast der, seier ho.

Men det har Mæland avvist kategorisk.

- Stortinget har fatta vedtak i saka. Eg har ikkje oppfatta at nokon av partia har endra oppfatning her, sa Mæland til Aftenposten sist veke.

(©NPK)

Fylkesordførar i Finnmark, Ragnhild Vassvik, har ingen planar om å bidra til fylkessamanslåing mellom Troms og Finnmark. Foto: Tore Meek / NTB scanpix