Fire av ti usikre kven som har best arbeidsløysepolitikk

- Delen som ikkje har ei oppfatning er oppsiktsvekkjande høg og burde interessere fleire parti, men særleg Arbeidarpartiet, seier valforskar Anders Todal Jenssen ved NTNU i Trondheim til Dagsavisen.

28,5 prosent av dei spurde meiner Arbeidarpartiet har best politikk for å sikre økonomisk tryggleik ved arbeidsløyse. Åtte prosent svarte Høgre, mens 11,2 prosent valde SV. Det kjem fram i YS' arbeidslivsbarometer som blir lagt fram under Arendalsveka tysdag.

Heile 38 prosent svarte at dei ikkje veit.

- Eg merkar meg at det er mange som er usikre på kva for eit parti dei meiner er best i desse viktige spørsmåla. Det får vi ta med oss. Vi skal mobilisere dei som ikkje har bestemt seg ved å vise fram at vi har den beste politikken for vanlege arbeidsfolk, seier nestleiaren i Arbeidarpartiet, Hadia Tajik, til avisa.

I 2017 fekk Arbeidarpartiet veljartillit på eldreomsorg, mens fleire oppgav at dei hadde høgare tillit til både Venstre og Høgre når det gjeld økonomi, industri og sysselsetting.

(©NPK)

Nestleiaren i Ap, Hadia Tajik seier partiet skal mobilisere dei som ikkje er sikre ved å vise at «Ap har den beste politikken for vanlege arbeidsfolk». Her saman med partileiar Jonas Gahr Støre under Arbeidarpartiets halvårlege pressekonferanse.
Foto: Berit Roald / NTB scanpix