Fire storbyar får millionar til byutvikling

Kommunal- og moderniseringsdepartementet opplyser i ei pressemelding at Bergen får 2,2 millionar kroner, Stavanger 2,5 millionar, medan Oslo og Trondheim får høvesvis 5,5 og 2,8 millionar kroner til arbeid med byutvikling.

I Bergen skal pengane gå til tre prosjekt, der auka bustadbygging langs bybana er høgt prioritert.

Stavanger får pengar til to prosjekt, der dei skal arbeide med å få til eit godt samspel mellom byutvikling og betring av levekåra i området Hillevåg.

I Oslo skal pengane gå til fire prosjekt, der det éine hovudprosjektet følgjer opp den regionale planen for samordna bustad-, areal- og transportplanlegging i med Akershus fylkeskommune.

Trondheim får 2, 850 millionar kroner til «Trondheim Bylab».

– Eg er glad for at byane no kan prøve ut nye smarte løysingar, metodar og samarbeidsformer. Byane lærer av kvarandre, og vi får meir effektiv og heilskapleg byplanlegging, seier kommunal- og moderniseringsminister Jan Tore Sanner (H). (©NPK)