Forbrukarrådet kritisk til oppfølging av feil på barnesete
(NPK-NTB): Barnesetet Concord Reverso kan ha ein feil som er farleg for barnet. Forbrukarrådet retter kraftig kritikk mot produsenten og butikkane for ikkje å ha gitt forbrukarane beskjed.
– Dette er eit produkt samvitsfulle foreldre kjøper for å sikre sine små. Då må vi kunne stole på at det oppfyller hensikta. Det er derfor svært alvorleg at produsenten har oppdaga ein feil, men ikkje gjort noko for å rydde opp, seier fagdirektør Gunstein Instefjord i Forbrukarrådet.
Produsenten seier at dei norske forhandlarane blei informerte om problemet i januar.
Feilen gjeld mekanismen som sørgjer for at barnet sit trygt i setet ved ein samanstøyt. Den opne beltestrammemekanismen kan vise seg å ikkje halde beltet stramt, og dermed risikerer ein at barnet ikkje blir halde skikkeleg på plass i stolen ved kollisjon, rundvelt eller andre dramatiske situasjonar, opplyser Forbrukarrådet.
Seta som kan ha feilen, er produserte frå februar til desember 2015, og det er selt fleire enn 700 av desse seta i Noreg. Totalt blei det produsert 7.000 slike stolar i denne perioden.
Ifølgje Forbrukarrådet blei norske forhandlarar informert om problemet 7. januar i år, men verken butikkane eller Concord har gjennomført noka informasjons- eller tilbakekallingskampanje. (©NPK)