Fotballandskamp vert sendt på Facebook
(NPK-NTB): Norges Fotballforbund går nye vegar når kvinnelandskampen mellom Noreg og Sverige vert vist direkte på Facebook måndag.
Det er første gong i norsk samanheng at ein landskamp blir vist på Facebook Live.
– Sosiale medium gir unike moglegheiter til tovegskommunikasjon med supporterar, samtidig som vi også når ut til yngre publikum enn i tradisjonelle mediekanalar. Privatlandskampen mot Sverige er ei ypparleg moglegheit til å teste dette ut for første gong, samtidig som vårt lange og gode samarbeid med NRK ligg fast i kvalifiseringskampar og sluttspel, seier kommunikasjonssjef Yngve Haavik i NFF til fotball.no.
NFF lokkar vidare med intervju med spelarar og trenar, i tillegg til «behind the scenes»-klipp før kamp, i pausen og etter kampslutt. Sjåarane vert også oppfordra til å sende inn spørsmål undervegs.
Kampen måndag, som vert spelt i Kristiansand, er ein del av førebuingane til kvinnelandslaget til neste års EM-sluttspel i Nederland.
Leif Gunnar Smerud debuterer i si nye rolle som mellombels landslagssjef. Rogalendingen steppar inn etter at Roger Finjord trekte seg i kjølvatnet av avsluttinga på EM-kvalifiseringa nyleg. (©NPK)