Hjelpearbeidar lauslaten i Kongo
Ein kongolesisk hjelpearbeidar som vart tatt som gissel aust i Kongo laurdag, er sett fri. To av kollegaene hans vart drepne.
Alle tre jobba for den franske organisasjonen Hydraulique sans Frontieres (HYFRO), som driv med vassreinsingsprosjekt.
- Han hadde fleire kutt i fjeset då vi fann han, opplyser HYFRO-leiar Richard Kahindo.
Mannen vart bortført laurdag då maskerte, væpna menn angreip bilen han sat i nær landsbyen Mushikiri i Nord-Kivu aust i Kongo.
Det var fire personar i bilen. I tillegg til mannen som vart bortført, vart to personar, ein ingeniør og sjåføren, drepne. Den fjerde mannen klarte å rømme.
Bortføring av utlendingar og kongolesiske personar knytt til humanitære organisasjonar er ikkje uvanleg i Nord-Kivu, der det er meldt om nye kraftige samanstøytar mellom militsar frå ulike folkegrupper den siste tida.
Hjelpearbeidarar er også blitt utsette for angrep og valdshandlingar i Kongo tidlegare. I fjor vart ein amerikansk mann og ei svensk kvinne drepne i Kasai-provinsen sentralt i landet.
(©NPK)