Harrison Ford fekk medhald i retten
(NPK-NTB): Eit britisk produksjonsselskap har i ein britisk domstol erkjent skuld i ulukka som for to år sidan førte til at Harrison Ford brekte beinet under innspeling av «Star Wars – The Force Awakens».
Produksjonsselskapet Foodles Productions la seg flate i retten og erkjende straffskuld for at ulukka kunne oppstå. Selskapet blir truleg bøtelagt, skriv The New York Times.
Under innspelinga blei Ford fastklemt i ei hydraulisk dør i romskipet Millenium Falcon.
Han fekk skadar i ankel og rygg og måtte operere beinet. Innspelinga av filmen måtte bli utsett i to veker. Ifølgje aktor kunne Ford ha omkomme i ulukka. (©NPK)