Heilsvart dag for Bø då også sprintcupen rauk
Johannes Thingnes Bø måtte sjå både samanlagtsigeren og sprintcupen ryke då han kom på 14.-plass i Tjumen torsdag. Martin Fourcade tok storeslem med siger.
Samanlagtsigeren i verdscupen verka svært vanskeleg for Bø å ta før avslutningshelga i Russland, men han hadde før distansen torsdag sprintcupen i lomma med 31 poeng luke til Fourcade.
To bom på liggjande skyting øydela likevel løpet for Bø, som til slutt enda heilt nede på 14.-plass. Det utnytta Fourcade, franskmannen skaut to fulle hus og sikra verdscupsigeren.
Det betyr at han i tillegg til å sikre samanlagtsigeren, også stikk av garde med sprintcupen i det som var den siste verdscupsprinten for sesongen.
Simon Desthieux sikra fransk dobbel med sin andreplass torsdag, mens svenske Fredrik Lindström vart trear på sprinten.
Tarjei Bø vart nest beste norske på 16.-plass etter éin bom, mens Holmenkollen-vinnar Henrik L'Abée-Lund kom på 25.-plass.
Vetle Sjåstad Christiansen vart nummer 26, mens Erlend Bjøntegaard, Lars Helge Birkeland og Ole Einar Bjørndalen enda på høvesvis 37.-, 38.-, og 39.-plass.
Fredrik Gjesbakk enda heilt nede på 57.-plass.
(©NPK)
Johannes Thingnes Bø enda på 14.-plass under verdscupsprinten i Tjumen torsdag. Foto: Heiko Junge / NTB scanpix