Hergeirsson før Russland: - Draumen lever
Thorir Hergeirsson har vore den reinaste gullfabrikken etter at han tok over handballjentene sommaren 2009. Onsdag kjem ei av dei tøffaste oppgåvene.
Då ventar Russland i VM-kvartfinalen. Det betyr eit møte mellom dei to laga som sit på alle dei internasjonale titlane: Noreg EM og VM, Russland OL.
Måndag var Hergeirsson hissig på pressekonferansen. Han liker ikkje arrangementet og meiner det ikkje er heilt fair.
- Det gjekk litt treigt. Vi spelte siste kamp, og så har vi pressekonferanse, og så er det nesten ingen journalistar der, utanom dykk. Vi ville heim for å restituere. Det gjekk litt treigt, ja, sa Hergeirsson til NTB.
- Men draumen (om gull) lever. Det var riktig flott innsats av gjengen i går. Dei jobba enormt bra etter Sverige-kampen og inn mot Spania. All honnør til jentene, la han til.
Norge - Russland er den moralske finalen i VM. Det er dei fleste samde om.
- Det er ny motstand og nye moglegheiter. Det er ein ny cupkamp. Vi kjenner godt til Russland, og det er full fart og massivt trykk i 2 x 30 minutt, som eg er glad for at vi får, sa Hergeirsson.
Men spelesystemet gjer at dei kan møtast så tidleg. I neste VM, i Japan 2019, blir det truleg ikkje cupspel etter puljekampane. Då går laga vidare til ein hovudrunde før cupkampane tar til.
Hergeirsson har tatt seks gull på ni meisterskap sidan han fekk jobben i 2009.
No risikerer han å ryke ut svært tidleg av VM.
(©NPK)
Thorir Hergeirsson kan ta sitt sjuande meisterskapsgull i VM. Foto: Vidar Ruud / NTB scanpix