Høgreekstrem politikar arrestert for forræderi i Hellas

Ein gresk parlamentarikar frå Gyllent daggry er arrestert for forræderi i samband med avtalen som er inngått i namnestriden mellom Hellas og Makedonia.

Konstantinos Barbaroussis er sikta for å ha førebudd høgforræderi etter at han i førre veke oppmoda dei væpna styrkane i landet til å arrestera statsministeren, presidentent og forsvarsministeren i Hellas for å hindra at avtalen blir gjennomført.

Utsegna kom under ein debatt i nasjonalforsamlinga fredag, noko som førte til latter og applaus frå andre representantar frå det naziinspirerte partiet. Andre politikarar reagerte derimot med raseri.

Avtalen inneber at Makedonia, som formelt heiter Den tidlegare jugoslaviske republikken Makedonia (FYROM), byter namn til Nord-Makedonia. Han blei signert i helga, men må gjennom ein lengre godkjenningsprosess før han kan setjast ut i livet.

Mellom anna må nasjonalforsamlingane i begge landa gje grønt lys, i tillegg til at det skal haldast ei folkeavstemming om avtalen i Makedonia.

Barbaroussis har trekt tilbake utsegna, som han meiner blei feiltolka.

- Det var eit uheldig ordval, men ho står heilt klart ikkje i forhold til dei lovbrota han no blir skulda for, seier forsvararen til Barbaroussis, Panagiotis Koradzopoulos.

Ifølgje politiet sette Barbaroussis seg ikkje til motverje då han måndag blei arrestert i eit hus i forstaden Penteli nord i Aten. Han skal etter planen framstillast for ein domstol onsdag.

Etter debatten fredag forsvann Barbaroussis. Han blei observert på ein motorveg vest i Aten fredag kveld. For å unngå å bli arrestert skal han ha køyrt forbi to politisperringar i 180 kilometer timen i kraftig regnvêr.

(©NPK)

Kostantinos Barbaroussis under ein demonstrasjon i Aten. Måndag blei han arrestert etter å ha oppmoda militæret til å arrestera mellom anna statsminister Alexis Tsipras. Foto: Petros Giannakouris / AP / NTB scanpix