ILPI endrar selskapsstruktur

(NPK-NTB): International Law and Policy Institute (ILPI) endrar selskapsstruktur etter at Stortingets kontrollkomité granska tildeling av midlar til selskapet.

«Styret i ILPI AS har i dag vedtatt at selskapet med datterselskaper overføres eller omdannes til en norskregistrert stiftelse eller non-profit selskap. Dette innebærer at det ikke vil kunne takast ut utbytte», skriv selskapet i ei pressemelding.

Ifølgje VG har dei tre eigarane dei siste åra teke ut 7,6 millionar kroner i utbytte.

Den siste tida har avisa skrive ei rekkje artiklar som har sett på tilhøvet mellom ILPI og Utanriksdepartementet. Mellom anna har dei skrive om at avtalane ILPI har inngått med UD sidan etableringa i 2009 er på over 150 millionar kroner. Den største tilskotsavtalen på 24 millionar kroner blir no granska av den sentrale kontrolleininga til UD.

Også Stortingets kontroll- og konstitusjonskomité har granska tildeling av midlar til selskapet.

I pressemeldingen skriv ILPI at kva selskapsstruktur som blir vald, kjem an på den faglege rådgjevinga som dei no vil henta inn.

– Ved å omdanna selskapa til ei stifting eller non-profit selskap, ser vi oss betre eigna til å møta forventningane frå fleire av oppdragsgjevarane våre, både i Noreg og i utlandet, seier partnar og dagleg leiar Njål Høstmælingen i ILPI. (©NPK)