Isak (17) klar for Dortmund

AIK-talentet Alexander Isak (17) har skrive under for Bundesliga-klubben Borussia Dortmund.

Isak har spelt i AIK sidan han var seks år. Han fekk sitt gjennombrot i den svenske eliteserien førre sesong med ti mål på 24 ligakampar. I januar fekk han sin landslagsdebut under januar-turneen i Abu Dhabi.

Rykta har vore mange om stortalentet, og fleire medium hevda at Real Madrid ønskte å sikre seg 17-åringen.

Måndag vart det klart at han skal utvikle seg vidare i Borussia Dortmund under trenar Thomas Tuchels leiing.

Overgangssummen har førebels ikkje blitt bekrefta av klubbane, men fleire medium hevdar at prislappen ligg på rundt 10 millionar euro (cirka 90 mill. kroner). Det er i så fall ny svensk rekord.

Fifa må godkjenne overgangen på grunn av Isaks unge alder.

(©NPK)