Kontroversiell lov godkjend i Ungarn
Nasjonalforsamlinga i Ungarn har godkjent ein kontroversiell lovpakke som blant anna kriminaliserer organisasjonar som hjelper migrantar.
Lova, som statsminister Victor Orban og regjeringa hans står bak, inneber blant anna at ein kan få fengselsstraff på opp til eitt år dersom ein hjelper asylsøkjarar som ikkje er i omgåande fare eller som har komne til Ungarn ulovleg.
Forslaget er ein del av ein større pakke regjeringa kallar «Stopp Soros»-lovene. Orban har peikt ut den ungarskfødde jøden George Soros som ein hovudfiende og driv ein omfattande svertekampanje mot han med plakatar og krass kritikk.
Den ungarske regjeringa hevdar blant anna at Soros har organisert og står bak migrasjonen til Europa. Partiet til Orban stemplar ofte politiske motstandarar som «Soros' kandidatar».
Milliardæren Soros har lenge drive stiftingar som arbeider med å fremja demokrati, menneskerettar og pressefridom i ulike delar av verda.
Sjølv avviser Soros påstandane til Orban, som han kallar «forvrenging og rein løgn».
- Regjeringa valde George Soros for dette formålet, lanserte ein massiv anti-Soros mediekampanje som kosta titals millionar euro av pengane til skattebetalarane, piska opp antimuslimske haldningar, og brukte antisemittiske formuleringar som minner om 1930-talet, har Soros uttalt på nettsida si.
(©NPK)
Den ungarske nasjonalforsamlinga godkjende eit kontroversielt lovforslag, dei såkalla «Stopp Soros»-lovene måndag. Foto: Szilard Koszticsak / AP / NTB scanpix