Likestillings- og diskrimineringsombod kritisk til foreslått Bergen-flytting
Regjeringa vil splitte dagens Likestillings- og diskrimineringsombod, og flytte klagesaksbehandlinga til Bergen. Ombodet kallar flyttinga ei "svekking".
- Eg fryktar at ei oppdeling og flytting vil ramme dei diskriminerte, seier ombod Hanne Bjurstrøm i ei pressemelding tysdag.
Regjeringa har foreslått at Likestillings- og diskrimineringsombodets klagesaksbehandling vert flytta til ei ny diskrimineringsnemnd i Bergen.
Den tidlegare arbeidsministeren for Arbeidarpartiet meiner den varsla flyttinga vil gå ut over dei som opplever diskriminering. Ho meiner konsekvensane av forslaget ikkje er tilstrekkeleg vurdert.
- Dagens situasjon krev ei styrking, ikkje svekking. Dette er ikkje tida for store endringar som vil setje handhevingsapparatet på vent, seier ho.
Ombodet har 65 tilsette og er fagleg uavhengig, men administrativt underlagt Barne- og likestillingsdepartementet.
Det blei oppretta i 2006, for å bidra til å overvinne diskriminering og fremje likestilling uavhengig av blant anna kjønn, etnisitet, funksjonshemning, seksuell orientering og alder. Per i dag har dei kontor i Oslo.
(©NPK)