Lundby på pallen i Tsjekkia
Maren Lundby enda på 3.-plass i fredagens Sommer Grand Prix-renn i hopp for kvinner i Tsjekkia og tok dermed første pallplassering denne sesongen.
Lundby blei berre nummer sju i SGP-opninga i Courchevel førre veke, men fekk det betre til i HS106-bakken i Frenstat. Ho hoppa 93 meter i første omgang, og det heldt til 2.-plass 4,4 poeng bak den leiande japanaren Yuki Ito.
I finaleomgangen slo Lundby av ein meter. Det blei berre det sjette beste hoppet i omgangen, men ho heldt seg inne blant dei tre beste.
Ito var det ikkje noko å gjere med. Med nest beste hopp i finaleomgangen sigra ho nesten fem poeng framfor franske Lucile Morat, som leverte det beste hoppet i finaleomgangen.
Det lengste hoppet i Frenstat hadde Ito med 95,5 meter i første omgang, men Morat fekk fleire poeng for hoppet sitt på 94,5 meter i finalen.
Det blei japansk triumf i Frenstat sjølv om den store stjerne Sara Takanashi blei diskvalifisert i kvalifiseringa på grunn av brot av reglane for skilengde.
Silje Opseth hoppa 82 og 75 meter og enda på 29.-plass. Det var nest sist av dei som fekk hoppe to gonger.
Samanlagt er Maren Lundby på 5.-plass i Sommer Grand Prix. Ito leiar framfor Morat. Katharina Althaus, som vann rennet i Courchevel, deltar ikkje i dei to renna i Tsjekkia i helga.
SGP blir avslutta med to renn i russiske Tsjajkovskij i september.
(©NPK)
Maren Lundby enda på 3.-plass i SGP-rennet i hopp i Tsjekkia fredag. Foto: Geir Olsen / NTB scanpix