Mæland fryktar at Finnmarks-opprør kan velte heile regionreforma

Heile regionreforma kan ryke dersom samanslåinga mellom Finnmark og Troms havarerer, fryktar kommunalminister Monica Mæland (H).

- Eg trur det kan få konsekvensar for resten av landet. Då må nok Stortinget drøfte kva dei vil gjere, seier Mæland om kva som skjer dersom Finnmark lykkast i kampen mot å bli slått saman med Troms.

Prosessen med å slå saman dei to nordlegaste fylka er i augneblinken heilt fastlåst. Måndag møter Troms til eit møte på Mælands kontor for å diskutere vegen vidare, mens Finnmarks fylkesordførar ikkje stiller.

Folkeavstemming

Varaordførar Tarjei Jensen Bech (Ap) viste til at 87 prosent stemte mot samanslåing i ei folkeavstemming i Finnmark i mai, då han møtte Mæland til duell under Arendalsveka fredag.

- Eg har eit sterkt mandat frå finnmarkingane som seier eit klart og tydeleg nei. Vi risikerte å måtte flytte all makt ut av Finnmark, og det er ikkje akseptabelt, sa Jensen Bech.

To stortingsvedtak

Mæland viste på sin side til at regionreforma - og dermed også samanslåinga - er vedtatt av Stortinget to gonger.

- Det handlar om prinsipp. Du kan vere rivande usamd, men når Stortinget har fatta vedtak, må det bli følgt opp, seier statsråden.

Når Stortinget samlast i oktober er det duka for ein tredje runde om Finnmark-Troms som eit nytt storfylke. Senterpartiet har varsla eit forslag som tar sikte på å parkere samanslåinga.

- Stortinget bestemmer sjølv kva dei vil vedta. Og ja, det er varsla ei ny sak i haust, seier Mæland.

(©NPK)

Kommunal- og moderniseringsminister Monica Mæland (H) i debatt om fylke og regionar under Arendalsveka. Foto: Terje Pedersen / NTB scanpix