Malta lèt Aquarius leggja til kai

- Spania har koordinert ein banebrytande avtale med seks land om å fordela mottaket av menneska frå Aquarius. Spania skal ta imot 60 menneske, skriv statsminister Pedro Sanchez på Twitter tysdag ettermiddag.

- Malta kjem til å la skipet leggja til, trass i at vi ikkje har noko juridisk plikt til å gjera det, opplyser Maltas regjering kort tid seinare.

I pressemeldinga heiter det vidare at Frankrike, Tyskland, Luxembourg, Portugal og Spania er einige om å ta imot dei 141 om bord på Aquarius.

Tidlegare tysdag sa Portugals regjering at dei er villig til å ta imot 30 av migrantane og flyktningane som blei berga i Middelhavet sist fredag.

Regionsstyresmaktene i Catalonia tilbydde seg same dagen å ta imot alle 141, men det ville ikkje sentralregjeringa i Madrid gå med på.

Det er 67 einslege mindreårige om bord i Aquarius, ifølgje mannskapet på redningsskipet, som blir drifta av organisasjonane SOS Mediterranee og Leger Uten Grenser.

Ifølgje dei to organisasjonane kjem 70 prosent av dei frå Somalia og Eritrea, og mange av dei er «ekstremt svekte og underernært».

Det er andre gongen at Aquarius blir nekta å leggja til kai både i Italia og Malta og må segla rundt i Middelhavet med migrantar og flyktningar som ingen vil ta imot.

Sist det skjedde var i juni, og då fekk skipet med 630 menneske til slutt leggja til kai i Valencia i Spania etter at fleire EU-land hadde gått med på å fordela ansvaret for å behandla asylsøknadene deira.

(©NPK)

Aquarius fotografert utanfor Marseille 1. august. Foto: Claude Paris / AP / NTB scanpix