Mann dømd for falsk bombetrussel for å rekke fly
Ein franskmann er dømd til fengsel i Storbritannia for å ha ringt inn falsk informasjon om ein bombetrussel. Mannen gjorde dette for å nå eit fly frå Gatwick.
Mannen, 47 år gamle Jacob Meir Abdellak, fekk dommen torsdag, melder Sky News.
- Dette var ei ganske latterleg avgjerd av Abdellak, som fann på ein ekstremt alvorleg påstand berre til eigen nytte, seier Marc Clothier i Gatwick-politiet.
Hendinga skjedde i mai i år ved den nest største flyplassen i London, Gatwick. Abdellak ringde politiet og fortalde om ein bombetrussel berre åtte minutt før flyet skulle gå.
Avgangen blei 90 minutt forseinka, men Abdellak blei arrestert på flyplassen.
(©NPK)