MDG ber Søreide kalle USAs ambassadør inn på teppet
MDG oppfordrar utanriksministeren til å kalle den amerikanske ambassadøren inn på teppet om barna som blir skilde frå foreldra på grensa mellom USA og Mexico.
- Det Trump no held på med, er umenneskeleg, og i strid med europeiske og norske verdiar. Å rive barn vekk frå foreldra gjer ein berre ikkje, seier Arild Hermstad, talsperson for Miljøpartiet Dei Grøne (MDG).
- Vi forventar at utanriksministeren snarast kallar den amerikanske ambassadøren inn på teppet. I denne saka må vi sende eit krystallklart signal om at Trump no har tråkka over ei grense og at ein slik oppførsel er totalt uakseptabel, seier Hermstad til NTB.
Etter at USAs president Donald Trump har innført strengare kontroll ved USAs grense mot Mexico, er tusenvis av migrantar internerte og over 2.000 barn tatt frå foreldra og sett i eigne interneringsleirar, noko som har ført til sterk kritikk både internt i USA og frå andre land.
(©NPK)
USA har møtt massiv kritikk etter at dei begynte å skilje barn frå foreldre som kjem ulovleg over grensa frå Mexico. Foto: U.S. Customs and Border Protection's Rio Grande Valley Sector via AP, File/ NTB scanpix.