MDG vil ha Støre ut av skapet – krev Lofoten-svar

– No må Jonas Gahr Støre sjå å komme seg ut av skapet, slutte med tåketalen og seie kva han eigentleg meiner, seier MDGs Rasmus Hansson.

Han er ikkje imponert over signala Ap-leiaren gjev i eit intervju med NTB, der Støre opnar for å komme med «føringar» før landsmøtet neste vår.

– Om Støre i det heile tenkjer på å gå til valet i 2017 på å opne Lofoten for oljeverksemd, bør han vere mann nok til å seie det no, meiner Hansson.

Motstanden frå småpartia har i tre stortingsperiodar effektivt stogga Lofoten-olje, til oljenæringas store fortviling. LO har òg kongressvedtak om konsekvensutgreiing, trass i sterk motstand frå fleire store forbund.

– Vår haldning ligg fast. Vi ønskjer konsekvensutgreiing, men vil ikkje ta stilling til eventuell opning før konsekvensutgreiinga ligg føre, seier LO-nestleiar Hans Christian Gabrielsen til NTB.

Kva Arbeidarpartiet fell ned på under sitt landsmøtet i april neste år, er førebels uklart. Partiet gjekk inn for konsekvensutgreiing av områda i 2013, men saka splittar partiet. Ap-leiar Jonas Gahr Støre vil ikkje antyde om partiet vil vidareføre standpunktet i den neste stortingsperioden.

– Det er opp til programarbeidet og landsmøtet å avgjere, seier Støre til NTB.

– No trur eg det er viktig at partiet får diskutere desse spørsmåla. Eg vil følgje debatten, så får vi sjå når det nærmar seg om eg kjem med føringar. Eg ser ikkje bort frå det, seier Støre.

– Har du alt tatt eit personleg standpunkt?

– Eg står godt på det standpunktet vi har i dag, seier Støre, som denne veka er på Vestlandet, der næringslivet hardast har fått merke låge oljeprisar og redusert aktivitet.

– Statsminister Erna Solberg (H) meiner oljeleiting i Lofoten og Vesterålen er viktig for verdiskapinga, i ei tid oljenæringa slit. Er du samd?

– Ap er for eit høgt og føreseieleg aktivitetsnivå på norsk sokkel, samtidig som vi tar våre miljø- og klimaplikter på alvor, seier Støre. (©NPK)