Mexico og Serbia bøtelagt i VM
Mexico og Serbia har fått over 80.000 kroner kvar i bot på grunn av støytande tilrop og upassande oppførsel frå tilhengarane deira.
Bøtene på 10.000 sveitserfranc vart bekrefta av Fifas disiplinærkomité onsdag. Nokre av Mexicos tilhengarar ropte «puto» under 1-0-sigeren over Tyskland i Moskva søndag. Det betyr mannleg prostituert på spansk og var mynta på spelarane til motstandaren.
Delar av Mexico-fansen ropte ifølgje nyheitsbyrået AP ein homohetsande song då Tysklands keeper Manuel Neuer gjorde seg klar for å ta femmeter. Ropet er ofte høyrd frå latinamerikanske tilhengarar og har resultert i fleire bøter frå Fifa i VM-kvalifiseringa.
Fifa har åtvara det mexicanske fotballforbundet, som vil bli straffa hardare om noko liknande skjer igjen under meisterskapen.
Det serbiske fotballforbundet har også fått ei bot. Den kom etter at nokre tilhengarar hadde med eit politisk og støytande banner om andre verdskrigen under 1-0-sigeren over Costa Rico. Serbia har hatt problem med høgreekstreme tilhengarar tidlegare.
Fifa har eigne antidiskrimineringseksperter til å overvake meisterskapen.
(©NPK)
Mexico-fansen jublar etter 1-0-sigeren over Tyskland. Undervegs i kampen kom delar av fansen med støytande tilrop mot dei tyske spelarane. Det har det mexicanske fotballforbundet no blitt bøtelagt for. Foto: Anthony Vazquez / AP / NTB scanpix