Minst 70 telt brann ned i flyktningleir i Irak

(NPK-NTB): Meir enn 70 telt blei øydelagde i ein brann i ein flyktningleir i Yahayawa i nærleiken av byen Kirkuk nord i Irak, melder Reuters.

Det er Høgkommissæren for flyktningar i FN (UNHCR) som opplyser om brannen.

– Vi kjem til å bidra med telt og naudhjelpsartiklar til familiar som er råka av brannen, seier Caroline Gluck, talsperson for UNHCR i Bagdad, til nyheitsbyrået Reuters.

Det er om lag 500 internt fordrivne familiar som er busett i flyktningleiren i Yahayawa. Leiren er driven av lokale styresmakter.

I førre veke melde UNHCR ar det er venta ein dramatisk auke i flyktningstraumen frå den IS-kontrollerte storbyen Mosul i Irak etter kvart som irakiske styrkar nærmar seg. Offensiven kan få enorme humanitære konsekvensar for sivilbefolkninga, og opptil 1,2 millionar menneske kan bli råka, åtvarar UNHCR.

FN-organisasjonen jobbar med å sette opp teltleirar i ei rekkje område i Nord-Irak, men det er vanskeleg å finne tilgjengelege stader som egner seg. (©NPK)