Minst tre omkom i jordskjelv i Japan
Minst tre personar omkom og over 90 er skadde etter at eit jordskjelv med ein styrke 6,1 ramma byen Osaka vest i Japan, ifølgje japanske styresmakter.
Skjelvet fann stad klokka 8 måndag morgon lokal tid.
To menn i 80-åra omkom i byane Ibaraki og Osaka, mens ei ni år gammal jente mista livet i byen Takatsuki. Alle tre døydde etter å ha blitt treft av samanraste vegger.
Skjelvet førte også til at rundt 170.000 bustader i og rundt Osaka mista straumen, og full stans i togtrafikken.
Talsperson for styresmaktene Yoshihide Suga sa like etter skjelvet at det ikkje var meldt om store skadar på verken eigedom eller menneske. Men i timane etter skjelvet har talet på omkomne og skadde auka.
Den japanske kringkastaren NHK melder at over 200 menneske er skadde.
(©NPK)
Inngangen til tempelet Myotoku-ji i Osaka raste saman då eit jordskjelv ramma området måndag morgon. Foto: Yosuke Mizuno / Kyodo News / AP / NTB scanpix