Ni av ti har fått plass på vidaregåande skule
(NPK-NTB): 90 prosent av dei som søkte om plass i førsteåret på vidaregåande skule frå hausten, har fått eit tilbod, viser ferske tal frå Utdanningsdirektoratet.
Totalt var det 77.703 søkjarar til skuleplass i Vg1 det komande skuleåret. Av desse har 71.594 fått eit tilbod, viser tal frå Utdanningsdirektoratet.
Samanlikna med tidlegare år har det vore ei kraftig auke i talet på søkjarar til helse- og oppvekstfag. Knapt 10.000 søkjarar til dette utdanningsprogrammet er over 1.100 fleire søkjarar enn i fjor, og over 600 fleire enn på same tid i 2015 har så langt fått ønsket sitt oppfylt.
Opptakstala til vidaregåande opplæring viser at det var til saman 210.651 søkjarar til skuleåret 2016– 2017. Knapt 191.000 er søkjarar til skule, medan i underkant av 20.000 har søkt om læreplass.
11.000 søkjarar står framleis på venteliste, og av dei er halvparten ungdommar med rett til plass – såkalla ungdomsrett.
– Ungdom som framleis står på venteliste treng ikkje uroa seg. Fylkeskommunane sørgjer kvart år for at alle som har rett på det, får ein skuleplass i sommar, seier utdanningsdirektør Hege Nilssen. (©NPK)