Ni drepne i angrep mot strandrestaurant i Somalia
(NPK-NTB-AFP): Til saman ni menneske vart drepne i angrepet mot ein populær strandrestaurant i Somalias hovudstad Mogadishu torsdag, opplyser styresmaktene.
– Ni menneske, blant dei to al-Shabaab-medlemmer, vart drepne i angrepet, seier ein talsmann for styresmaktene i Mogadishu, Abdifatah Halane, fredag morgon.
– Alle angriparane er skotne og drepne, og restauranten er no under full kontroll av somaliske regjeringssoldatar. Ni personar vart drepne i terrorangrepet, fem av dei sivile, to frå sikkerheitsstyrkane og dei siste to var opprørarar som stod bak angrepet. Vidare vart to sivile såra, utdjupar distriktspolitisjef Abshir Bishaar.
Den ytterleggåande opprørsgruppa al-Shabaab, som har tilknyting til al-Qaida, tok torsdag kveld på seg ansvar for angrepet på strandrestauranten Banadir, nær bystranda Lido. Angriparane utløyste først ei bilbombe før dei begynte å skyte mot sikkerheitsstyrkar som kom til staden. Opprørarane kasta også granatar mot sikkerheitsstyrkar som prøvde å sperre av området.
Strandrestauranten er populær blant unge menneske og tilsette i regjeringsapparatet.
I slutten av januar vart minst 20 menneske drepne i eit bilbombeangrep mot eit hotell og ein restaurant på den same Lido-stranda. (©NPK)