Norsk Flygerforbund og Babcock einige om avtale for ambulanseflygarar
Det er semje i lønnsforhandlingane mellom Norsk Flygerforbund og Babcock for flygarar i ambulanseflytenesta.
- Vi håper at avtalen kan vere eit viktig bidrag til å løyse krisa i luftambulansetenesta, seier forbundsleiar Yngve Carlsen i Norsk Flygerforbund i ei pressemelding.
Flygerforbundet og NHO Luftfart, som forhandlar på vegner av Babcock, tok opp att forhandlingane om ein tariffavtale tysdag morgon og melde om semje litt før klokka 3.30 natt til onsdag.
- Det viktigaste vi har oppnådd gjennom denne avtalen er å bidra til kontinuitet i luftambulansetenesta, ved at alle ambulanseflygarar som ønsker det, er sikra framleis jobb på same arbeidsstad som dei har i dag. Vi har akseptert reduserte lønns- og arbeidsvilkår, og Norsk Flygerforbund har ved å inngå ein avtale tatt eit betydeleg samfunnsansvar for å sikre den livsviktige luftambulansetenesta, seier Carlsen.
Den førre forhandlingsrunden mellom Babcock og pilotane stranda i slutten av april etter at Babcock ikkje fekk gjennomslag for eit krav om at pilotane og fagforeininga fråskriv seg retten til å gå til sak for å behalde lønna og arbeidsvilkåra dei har hos Lufttransport.
Forbundsleiar Yngve Carlsen i Norsk Flygerforbund. Foto: Vidar Ruud / NTB scanpix