Curlinggutane slo Italia i EM

Noreg og Italia følgde kvarandre tett i starten av kampen, og etter seks rundar stod det 4-4. Men derifrå og ut handla det meste om dei norske gutane. To poeng i runde sju blei etterfølgt av eitt poeng i åttande runde. Mens Italia kara til seg eitt poeng i nest siste runde, vann Noreg så den siste 1-0. Dermed blei resultatet 8-5. Det gav den fjerde sigeren i meisterskapen for Noreg.

Tidlegare på dagen hadde det norske laget få problem med å slå Slovakia 7-2.

Etter fem rundar har Ulsrud og co. vunne fire kampar, mot Russland, Nederland, Slovakia og Italia. Det einaste tapet i meisterskapen så langt kom mot Sveits, som elles leider med fem strake sigrar. Noreg ligg saman med Skottland og Sverige på plassen bak.

Det norske laget er i tillegg til skip Ulsrud sett saman av Torger Nergård, Christoffer Svae og Håvard Vad Petersson. Sander Rølvåg er reserve.

Det norske kvinnelaget, med Kristin Skaslien som skip, vann måndag 8-4 over England, før det blei 2-9-tap mot Finland. Kvinnelaget, som spelar i B-gruppa, har fire sigrar og eitt tap så langt.

(©NPK)

Thomas Ulsrud (midten) leidde Noreg til 7-2-siger over Slovakia i curling-EM. Her er han saman med Håvard Vad Petersson og Christoffer Svae under Sotsji-OL i 2014. Foto: Jon Eeg / NTB scanpix