Omstridt forsamling i Venezuela gir seg sjølv lovgivande makt
Den regjeringsvennlege grunnlovsgivande forsamlinga i Venezuela har vedtatt å gi seg sjølv lovgivande makt.
I eit dekret som blei vedtatt fredag, gir forsamlinga seg sjølv makt til å innføre lover på ei rekke område, blant anna innan sikkerheits- og suverenitetsspørsmål.
Avgjerda kjem etter at leiinga for nasjonalforsamlinga, som er dominert av opposisjonen, nekta å sverje truskap til den grunnlovsgivande forsamlinga.
Valet til den omstridde forsamlinga blei halde 30. juli i år. Den vil i praksis kunne sette til side nasjonalforsamlinga, som opposisjonen har kontrollert sidan valet i 2015.
Regjeringa hevdar opposisjon gjennom månadslange protestar jobbar saman med USA for å få avsett president Nicolás Maduro. Men også ei veksande liste med utanlandske regjeringar nektar å anerkjenne den nye grunnlovsgivande forsamlinga.
Minst 125 personar har sidan april mista livet i opptøyar og samanstøyt i Venezuela. FN meiner sikkerheitsstyrkar og regjeringsvennlege grupper har ansvar for minst 73 av dødsfalla.
Oljerike Venezuela slit med skyhøg inflasjon, aukande kriminalitet og arbeidsløyse i tillegg til mangel på medisinar og andre basisvarer. Hittil i år har over 52.000 venezuelanar søkt asyl i utlandet, nesten dobbelt så mange som i heile fjor. Det blir rekna med at langt fleire har forlate landet, som har ei befolkning på rundt 30 millionar.
(©NPK)
En demonstrasjon mot regjeringa i Venezuela tidlegare denne månaden i hovudstaden Caracas. Foto: Ariana Cubillos / AP / NTB scanpix