Over 2.700 husstandar utan straum i Agder
Over 2.700 kundar i agderfylka var onsdag morgon utan straum på grunn av snøvêret tysdag, opplyser Agder Energi.
I hovudsak kjem straumbrota av snøtunge tre som ligg inntil linjene, og linjer som ligg på bakken grunna trefall, opplyser selskapet.
Agder Energi jobba natt til onsdag for fullt med feilsøking og feilretting, og 3.500 kundar har fått straumen tilbake. Samtidig oppstod det nye straumbrot gjennom natta. Klokka 8 onsdag var totalt 2.753 av Agder Energis kundar utan straum, opplyser selskapet.
Linjenettet blei tysdag befart ved hjelp av helikopter. Etter planen fortset synfaringa med hjelp av fire helikopter onsdag.
Noregs vassdrags- og energidirektorat (NVE) opplyste tysdag kveld at 9.250 kundar var utan straum på Sør- og Austlandet. Over 6.000 av desse var i agderfylka.
Store snømengder ramma heile Søraust-Noreg tysdag. Det førte til at veg-, tog- og flytrafikken gjekk i stå, og straumbrot førte til både stengde skular og barnehagar. Så mange som 22.400 husstandar var utan straum ein periode tysdag ettermiddag.
(©NPK)
Store mengder med snø på Sør- og Austlandet tysdag førte til straumbrot og vanskeleg køyreforhold. Her frå Drammensbrua tysdag. Foto: Lise Åserud / NTB scanpix