Per Sandberg går av som nestleiar i Framstegspartiet
Per Sandberg har gitt Framstegspartiet beskjed om at han går av som nestleiar, i tillegg til at han trekkjer seg som fiskeriminister.
- Det har vore opp- og nedturar, og eg er stolt av å ha vore med på å byggje Framstegspartiet til eit stort og sterkt parti. No er likevel tida inne for å gå vidare, gjere noko anna og få moglegheit til å bruke meir tid på privatlivet, seier Sandberg.
Han har vore nestleiar sidan 2006, same år som Siv Jensen vart valt til partileiar. Etter å ha fått massiv kritikk etter Iran-ferien saman med kjærasten Bahareh Letnes, valde Sandberg måndag å gå av som fiskeriminister. Kort tid etter kom beskjeden om at han også trekkjer seg som nestleiar i partiet.
Sandberg har vore stortingsrepresentant frå 1997 til 2017 og har leidd både Stortingets justiskomité og transportkomité.
- Per har vore viktig for Frp og regjeringa gjennom mange år. Han har gjort ein formidabel innsats for partiet over mange år, og det blir eit stort rom å fylle. Eg meiner likevel det er klokt at Per no vel å gå av. Per er ein av dei mest erfarne rikspolitikarane i partiet. Eg vil takke for hans betydelege innsats for partiet over mange tiår, seier Jensen.
Ho møter pressa seinare måndag i samband med Sandbergs avgang.
Siv Jensen og Per Sandberg har saman vore partileiar og nestleiar i Framstegspartiet sidan 2006. Foto: Lise Åserud / NTB scanpix