Putin til Tyskland for å drøfta Syria og Ukraina med Merkel
Russlands president Vladimir Putin reiser laurdag til Berlin for å drøfta utviklinga i Syria og Ukraina med statsminister Angela Merkel.
Merkel vil ta imot Putin på feriestaden til regjeringa Meseberg slott, nord for Berlin. Det blir ingen felles pressekonferanse, men korte utsegner til media, seier Merkels pressetalsmann Steffen Seibert.
Det uformelle møtet vil dreia seg om konflikten i Syria, situasjonen i det austlege Ukraina og energispørsmål, seier Seibert.
Tilhøvet mellom Russland og vestlege land har lenge vore spent. To stikkord er nettopp Syria og Ukraina, men også forsøket til russiske hackarar på å blanda seg inn i val og sanksjonane etter giftskandalen i Salisbury har skapt store gnissingar.
Putin og Merkel trefte kvarandre sist i svartehavsbyen Sochi i mai. Den tyske statsministeren reiste ikkje til Russland under fotball-VM.
(©NPK)
Russlands president Vladimir Putin reiser laurdag til Berlin for å drøfta Syria og Ukraina med statsminister Angela Merkel. Foto: AP / NTB scanpix