Rundt 80 bilar sette i brann og vandaliserte sør i Sverige

Bilde og videoar som er blitt publisert på sosiale medium, viser bilar i brann fleire stader i Göteborg og litt lenger nord, i Trollhättan. Ein kan også sjå fleire svartkledde personar som set fyr på bilane.

Redningstenesta opplyste først i 21-tida måndag at det dreidde seg om mellom ti og fjorten bilbrannar i området, ifølgje avisa GT. Deretter har talet auka.

Svartkledde

Dei første meldingane gjaldt bilar som var tende på ved Frölunda Torg i Göteborg. Det er også komme meldingar om bilbrannar i Kronogården i Trollhättan. Fleire kjelder beskriv gjerningspersonane som svartkledde ungdommar.

- Eg såg tre-fire svartkledde gutar. Ein av dei kastet ein molotovcocktail mot ein bil som tok fyr med ein gong. Så var det kraftig smell, fortalde eit augevitne til avisa.

- Dette var organisert. Dei ville gjere så mykje skade som mogleg. Eg var redd.

Ifølgje SVT vart ungdommane observert berande på dunkar med ei væske som dei helte på bil etter bil for så å tenne på.

Kastet stein mot politiet

Så langt skal ingen ha blitt arrestert. Politiinspektør Claes Dahlström sa til kanalen at då politiet møtte opp ved ein av stadane, kasta ungdommane stein mot dei.

- Dei var maskerte med hettegenserar og med caps ned over ansiktet slik at det var vanskeleg å identifisere dei, sa Dahlström.

Ifølgje politiets pressetalsperson Ula Brehm har det ikkje komme inn meldingar om personskade.

(©NPK)

Foto: Johan Nilsson/TT / NTB scanpix