Russland øver med missil nær grensa mot vest
(NPK-NTB-AP): Russland har utført øvingar, som blant anna har involvert kortdistansemissil, nær den vestre grensa i landet, opplyser det russiske forsvaret torsdag.
Missila det er gjort øvingar med er kjent som Iskander-M og har ei rekkevidde på 500 kilometer. Dermed kan missilet treffe mål i fleire Nato-land.
Øvinga blei utført nær byen Luga, omtrent 100 kilometer frå grensa mot Estland. Militæret seier sjølv at øvinga gjekk ut på utplassering av missil og førebuingar til å fyre dei av. Iskander kan utstyrast med både konvensjonelle stridshovud og atomstridshovud.
Moskva har vist sterk misnøye med utplassering av Nato-styrkar nær grensene sine og har lovd å gjere mottiltak.
Dette er den andre missiløvinga denne månaden nær Russlands vestre grense. (©NPK)