Salah klar til dyst mot Russland
Stjernevingen Mohamed Salah er endeleg klar for VM-debut når Egypt går for siger mot høgtflygande russarar i St. Petersburg tysdag.
Russland fekk ein pangstart på meisterskapen på heimebane med 5-0 over Saudi-Arabia, mens Egypt tapte 0-1 mot Uruguay med Salah på benken.
Tysdag er Liverpool-profilen klar for spel etter å ha vore ute med ein skulderskade.
- Han spelar kampen etter å ha deltatt i to treningsøkter, seier ein talsmann for Egypt-troppen, ifølgje nyheitsbyrået DPA.
Landslagssjef Héctor Cúper motstod freistinga å byte inn Salah i opningskampen. Der stod det 0-0 til Jose Gimenez stanga inn uruguayansk siger i det 89. minutt.
- Vi ville unngå risiko. Vi ønsker å ha han i toppform mot Russland og Saudi-Arabia, forklarte Cuper.
Egypt treng i praksis minst uavgjort mot russerne for å ha sjanse til å ta seg vidare til VMs åttedelsfinale.
(©NPK)
Mohamed Salah får truleg sine første VM-minutt mot Russland tysdag. Foto: Mark Baker / AP / NTB scanpix