Siv Jensen varslar innstramming på forbrukslån

Finansminister Siv Jensen (Frp) ber Finanstilsynet utarbeida krav til utlånspraksis for forbrukslån.

Nyheita kom i samband med at Jensen presenterte den nye bustadlånsforskrifta tysdag. Bakteppet er ei forbruksgjeld i kraftig vekst, noko som skaper uro for at fleire hushald kan få gjeldsproblem.

- Styresmaktene har difor sett i verk ei rekkje tiltak for å få denne marknaden til å fungera betre. Tiltaka må få tid til å verka, og bankane som tilbyr forbrukslån, må etterleva krava som blir stilt, seier Jensen, men legg til:

- På eitt område ser vi allereie no at det er behov for å stramma til. Vi ser at det dessverre er enkelte som ikkje etterlever retningslinjene til Finanstilsynet for forsvarleg utlånspraksis for forbrukslån godt nok. Eg har i dag bede Finanstilsynet om å føreslå forskriftsfesta krav til utlånspraksis, også for forbrukslån, seier finansministeren.

(©NPK)

Finansminister Siv Jensen (Frp) vil forskriftsfesta krav til utlånspraksis for forbrukslån. Foto: Terje Pedersen / NTB scanpix