Sjukehus: Minst 22 drepne i sjølvmordsangrep i Somalias hovudstad
Minst 22 menneske er drepne i eit dobbelt bilbombeangrep i Somalias hovudstad Mogadishu, opplyser sjukehusdirektør Mohamed Yusuf.
Den første bilbomba ser ut til å ha blitt løyst ut av ein sjølvmordsbombar, nær hovudkontoret til etterretningstenesta i landet. Den andre eksplosjonen skjedde nær nasjonalforsamlingsbygningen, opplyser polititalsmann Mohamed Hussein.
Sjåføren av køyretøyet som eksploderte, prøvde å ta seg gjennom ei sperring i høg fart, nær nasjonalforsamlinga, opplyser Hussein.
Denne bygningen ligg nær presidentpalasset. Ifølgje Hussein innleidde sikkerheitsstyrkar skotveksling med væpna menn som ein antar prøvde å ta seg inn i presidentpalasset.
Så langt er det ingen som har opplyst at dei har stått bak åtaket fredag.
Åtaket fredag ettermiddag skjedde dagen etter at innanriksministeren i landet åtvara om at det var eit køyretøy med eksplosiv i hovudstaden.
Eksplosjonane fann stad etter fleire månader med ro i hovudstaden, der ekstremistgruppa al-Shabaab tidlegare har gjennomført ei rekke angrep.
(©NPK)