Spanske helsemyndigheiter: Abidal-operasjonen var lovleg
Spanske helsemyndigheiter avsluttar etterforskinga av Barcelona etter mistankane om at klubben kjøpte ei lever til kreftsjuke Eric Abidal på ulovleg vis i 2012.
Den spanske avisa El Confidencial hevda tidlegare i juli at spansk politi har avlytta fire telefonsamtaler frå tidlegare Barcelona-president Sandro Rosell. Der skal han ha innrømt at klubben kjøpte ei ulovleg lever til Abidal.
Barcelona nekta for det heile, og no stadfestar spanske helsemyndigheiter at transplantasjonen blei gjort på lovleg vis.
- Transplantasjonen blei utført i samsvar med lova og god klinisk praksis, heiter det i ei pressemelding tysdag.
Klinikken der operasjonen blei utført skal kunne vise til fødselsattestane til både Abidal og donoren. Dermed er etterforskinga avslutta.
Den tidlegare franske landslagsspelaren Abidal la opp i 2014 - to år etter transplantasjonen. Han er no tilsett som sportsdirektør i Barcelona.
(©NPK)