Store skogbrannar røyklegg delar av Indonesia
(NPK-NTB-AP): Skogbrannar røyklegg endå ein gong store delar av Indonesia. Seks av provinsane i landet har erklært unntakstilstand.
På øya Sumatra er millionar av menneske ramma av røyken, og eit aukande tal brannar er registrerte her og på Borneo.
Røyken har også nådd Malaysia og Singapore, der luftkvaliteten fredag sokk til eit helsefarleg nivå.
Store brannar bryt kvart år ut i regnskogen i Indonesia, og mange blir starta av bønder og store selskap som vil rydde nytt land til jordbruk. Også område med torv blir tende på, noko som fører til store utslepp av klimagassar.
Brannane i fjor var nokre av dei verste på mange år, og til saman gjekk over 260.000 hektar opp i røyk. Utsleppa av klimagassar frå brannane var like store som Japans utslepp gjennom eit heilt år, ifølgje NASA.
Så langt har 2.800 hektar brent i Indonesia i år, ifølgje skogdepartementet i landet. Unntakstilstanden i seks provinsar betyr at sløkkingsarbeidet vil bli trappa opp. (©NPK)