Suksessen til utanlandsproffane gler Lagerbäck

Tysdag presenterte Lagerbäck den norske troppen til landskampane mot Island (borte) og Panama (heime) i starten av juni. Der fekk berre to heimlege spelarar frå Eliteserien sleppe til, mens dei 24 andre spelar utanfor Noreg.

Du skal ikkje så langt tilbake i tid då speletid var ein problem for ein god del av utanlandsproffane. No ser det atskilleg betre ut.

- Det er mange som har prestert veldig bra. Eg synest det ser betydeleg betre ut no enn i fjor vår. Det gjeld både prestasjonar og speletid. I dag er det vel eigentleg berre Sander Berge (Genk) og Alexander Sørloth (Crystal Palace) som har hatt lite speletid, seier Lagerbäck til NTB.

Berge var i helga tilbake for klubblaget for første gong etter eit sju månader langt skademareritt (lår), mens Sørloth blei sett tilbake av ein belastingsskade få veker etter overgangen til Palace i vinter.

Fast

I nederlandsk fotball herjar dei norske spelarane. Bjørn Maars Johnsen slo til med heile 19 mål for Den Haag og var ikkje langt unna å bli toppscorar i æresdivisjonen. I AZ Alkmaar har både Jonas Svensson og Fredrik Midtsjø vore faste innslag. Midtsjø har vore så botnsolid at han toppa spelarbørsen til ein av dei største avisene i Nederland etter sesongen.

Stefan Johansen har også hatt ein krutsterk sesong med Fulham i den engelske meisterskapsserien. Laurdag kan midtbanespelaren hjelpe London-laget til Premier League. Då ventar Aston Villa på motsett banehalvdel til opprykksfinale på Wembley.

Sjølv trekte Lagerbäck fram Martin Linnes under uttakspresentasjonen tysdag. 26-åringen blei sist helg tyrkisk seriemeister med Galatasaray.

- Det er ein veldig god spelar å ha med i gruppa. Han er veldig allround og jobbar hardt for laget. Eg følte for å løfte fram akkurat han fordi han kanskje ikkje er den mest spektakulære spelaren som får mykje merksemd, men har slått seg inn i ein av dei absolutt beste klubbane i Tyrkia. Han held veldige gode spelarar utanfor laget, seier Lagerbäck til NTB.

Selnæs-ros

I Frankrike har Ole Selnæs hausta mykje ros for prestasjonane sine på midtbana til Saint-Étienne. Trønderen var ein del inn og ut av laget i fjor haust, men etter årsskiftet beit han seg fast i startoppstillinga. Selnæs har nytt godt av å få Jean-Louis Gasset som trenar.

- Det er det fascinerande med fotball. Med ny trenar forandra dei spelet sitt litt, og han (Gasset) har gitt Ole ei rolle som er heilt ideell, meiner Lagerbäck.

Noreg møter Island i Reykjavik 2. juni. Deretter kjem Panama på besøk til Ullevaal stadion 6. juni.

(©NPK)

Landslagssjef Lars Lagerbäck kan glede seg over at dei norske utanlandsproffane får bra med speletid. Foto: Terje Pedersen / NTB scanpix